НОВИ САД/РУСКИ КЕРЕСТУР – Новинско-видавательна установа „Руске слово” означела свой дзень, интерно у кругу колектива, представнїкох Националного совиту Руснацох, членох Управного одбору, колеґох и пензионерох Установи.
Порядну дворочну награду Часописа за дзеци „Заградка”, котра ноши мено писателя „Михайла Ковача”, подзелєли Леа и Анамария Ранкович, а додзелєна є за найлєпши авторски тексти, активносц и иновативносц у часопису „Заградка”, за период од 2024. по 2026. рок.
Дворочна награда Мултимедиялного часописа за младих МАК додзелєна Анї Гудак Заґоричник за найлєпши дизайн и илустрациї, як и активносц и иновативносц у часопису МАК, за период од 2024. по 2026. рок.
З нагоди Дня НВУ „Руске слово” отворена вистава „История Новинско-видавательней установи „Руске слово” през 24 заглавя: „Руске слово” – вик як клїпнуце”. Слово о урамених 24 насловнїцох и лоґоох, котри одражую моменти историї пременкох и розвою виданьох НВУ „Руске слово” у дружтвено-политичним контексту.
Видео прегляд вистави мож видзиц на тим линку.
Вистава представена на трох язикох, заглавя у рамох по руски, а каталоґ-брошурка по сербски и анґлийски, котру госци и муштериї НВУ „Руске слово” годни и убудуце нащивиц.
Зоз пригоднима словами присутних привитали и поздравели – директор Установи др Борис Варґа, Амбасадор України у Републики Сербиї Олександeр Литвинeнко, предсидатель Националного совиту рускей националней меншини Стеван Самочета як и предсидателька УО Установи Златица Няради. На преслави були присутни и предсидатель Вивершного одбору НСРНМ Славиша Сабадош, заняти, пензионере, члени Управного одбору и представнїки значних руских институцийох.
