Язик вше бул вецей од средства комуникованя. Вон жвератко нашей култури и нашей вязи зоз историю. Язик формує идентитет и традицию єдного народу. Културу ше пестує през слова, чува ше язик, а наша бешеда то сущносц нашого идентитету.
На очуваню руского язика и шицкого цо вон представя за нашу заєднїцу, нашей култури и обичайох, роками вредно и упарто роби наша собешеднїца, учителька Славица Мали зоз Вербасу.
– Походзим зоз фамелиї у котрей ше вше пестовало руску бешеду, виру и културу. Барз нам було важне бешедовац по руски, ходзиц до церкви и пестовац нашо обичаї, традицию и културу – почина приповедку Славица, толкуюци же ю руски язик провадзи и през цале образованє.
– У Керестуре сом закончела Штредню педаґоґийну школу, потим сом ше уписала и до Висшей двоязичней, а вец и на Учительски факултет у Зомборе. Робиц сом почала у порядней настави, а накадзи ше учителька котру сом заменьовала врацела на роботу, почала сом тримац наставу по руски, у октобру 1993. року – здогадує ше на свойо перши крочаї у роботи.
Початки ученя мацеринского язика у Вербаше
Дружтво за руски язик и литературу и КПД „Карпати” були иницияторе же би ше у СО Вербас отримало розгварку зоз тедишнїм предсидательом СО др Срдяном Стокучом, на котрей присуствовали директоре шицких основних школох у Вербаше, предсидатель КПД „Карпати” Звонко Сабо, предсидатель Дружтва за руски язик и литературу Ирина Папуґа и предсидатель Подружнїци Дружтва за руски язик и литературу у Вербаше Славица Мали. Теди ше присутни порадзели же би ше потримало намаганя орґанизовац факултативне ученє руского мацеринского язика у шицких вербаских основних школох.
У „Карпатох” була отримана схадзка за родичох котру водзели Папуґова, Малийова, Сабо, як и предсидатель секциї за пестованє мацеринского язика Славко Сабо. Присутни були коло 30 родичи, а резултат схадзки бул таки же на факултативне ученє руского язика були приявени 30-еро дзеци. Шлїдуюца акция позазберовац руски дзеци була орґанизована у вербаских основних школох у котрей, окрем Малийовей, участвовали и члени Дружтва Владимир Буилчик и Владимир Будински. На наставу мацеринского язика з елементами националней култури того 1993. року при учительки Славици вкупно були уписани 69-еро школяре.
Настава у штирох школох
Роками ше настава одвивала у шицких штирох основних школох у Вербаше, а тераз Малийова роби у трох – „Светозар Милетич”, „20. октобер” и „Братство єдинство”. У школи „П. П. Нєґош” тераз нєт дзеци котри би учели руски язик, можебуц бо нєт Руснацох у тим краю Вербасу, гвари Славица.
– Почала сом зоз 90 школярами, алє як и у порядней настави, и ту ше зменшало число дзецох, та их мам коло 70 и барз сом задовольна. Поряднє ходза на годзини, и цешим ше же сом их нє потрацела.
Настава ше одвива у школи, а вецей як 50 школяре зоз „С. Милетич” на годзини ходза соботами до просторийох КПД „Карпати” и до парохиялней сали при Грекокатолїцкей церкви Покрова Пресвятей Богородици у Старим Вербаше, у поради зоз директором Школи Славишом Лубуричом, понеже так лєгчейше позберац дзеци.
– Скорей зме годзини тримали так же єдна годзина була у школи, єдна у Дружтве, и мнє ше тот способ роботи барз пачел. У школи робота була фокусована на язик и литературу, а националну културу зме пестовали у „Карпатох”. Кажде дзецко було уключене до даєдней секциї у Дружтве, а зо мну рихтали програми котри були тематични – за Осми марец, Вельку ноц, стретнуце зоз писателями, рижни роботнї… Вше сом ше намагала так орґанизовац роботнї, наприклад кед учиме о руским обисце, облєчиву, националних єдлох, же би то було интересантне, динамичне, вифарбене и цифроване на хамер паперох и иншак, же би остали шлїди нашей роботи котри би и други видзели.
У старовербаскей грекокатолїцкей церкви Славица сотрудзує зоз парохом о. Алексийом Гудаком, як и з вироучительку Ксению Бесерминї, та вєдно рихтаю програму за Святого Миколая. Пред тим тоту парохию водзел о. Юлиян Рац, кед тото красне сотруднїцтво зоз церкву и почало, и тирва по дзень нєшка.
– Од учебнїкох хаснуєме ище кнїжки професора др Якова Кишюгаса, ту и кнїжка Ана Мариї Рац и Олї Яковлєв, а нєсцерпено обчекуєм и радуєм ше новей кнїжки хтора уж написана. Барз нам є хасновита, а хаснуєме и „Заградку”, дзе и посиламе нашо роботи. Читаме и други кнїжки наших рускох писательох, и вше найдземе интересантни способ же би ше дзеци и забавели, а и дацо научели – толкує Славица и додава.
– Я робим на иншаки способ од порядней, класичней настави. Баржей учиме през бависко, од конца ґу початку, прето же дзеци треба заинтересовац и направиц добру роботну атмосферу. Учитель ше муши барз добре порихтац же би дзецом було приємно, же би им затримал увагу и дзеку же би приходзели на годзини.
По словох нашей нашмеяней учительки, як час преходзи, вона ма вше вецей идеї за роботу – обдумує рижни бависка, компютер єй помоц, а Тему „пайташ”.
– На годзинох читаме, пишеме, учиме рецитовац писньочки, шпивац шпиванки, алє вше маме даяке бависко, або наставни лїсток, дацо тематично вязане за наставну єдинку хтору обрабяме. Вец дзеци то лєгчейше прилапя и баржей паметаю – толкує Славица, предлужуюци: – Остатнї час вельо хаснуєме домини, бависка паметаня и инше, дзе вони през слички и слова науча рижни поняца вигваряц, пречитац, а и забавя ше, бо ше медзисобно змагаю. Анї су нєсвидоми же през бависко и уча. Барз любя дописовац букви, або слова у текстох хтори им порихтам, лєбо читац драмски слички по улогох… Вше єст даяки нови, интересантни активносци, алє вше фокус на руским язику. У идуцим школским року плануєме отримац заєднїцку явну годзину зоз школярами зоз Кули, приду нам до нащиви, лєбо ми там пойдземе, уж як ше порадзиме. Же би ше и упознали, и дружели, а и дацо нове видзели и научели.
Школяре дзечнє читаю и опатраю шицки дзецински виданя нашей Новинско-видавательней установи, а друженя з писателями, одходи на Мемориял и дзецински представи по руски им окреме мила награда за роботу и труд. Славицово школяре порядни на змаганьох зоз руского язика, дзе вше позбераю награди и припознаня, а участвую и на Лєтней школи руского язика.
– Участвуєме и на Фестивалу хорох у Вербаше, дзе дзеци у народним облєчиве привитую госцох, як и на означованю дньох школох. Тиж, и за нашо Националне швето, як и за други нашо швета, вше обдумаме и порихтаме дацо пригодне. Дзеци наисце вредни, любопитлїви, и вше розположени за нови знаня и утвердзованя того цо уж знаю. Читаме, пишеме, рецитуєме, шпиваме, лєм же бизме нє страцели тот наш красни руски язик.
Повязани школа, културно-просвитне дружтво и церква
Славица люби хасновац рижни дидактични материял, котри дзецом помогнє же би тото цо уча лєгчейше запаметали. Зоз своїма школярами ше цеши, а, як гвари, робота з нїма єй велька потїха и одпочивок за душу.
– По моїм думаню, и сиґурна сом же то так, же школа, културно-просвитне дружтво и церква муша сотрудзовац, то муши буц повязане. Прето сом зоз школярами и ту у церкви, и у „Карпатох”, муша дзеци познац нашо руске дружтво. У „Карпатох” пестуєме културу, у церкви обичаї, у школи учиме язик и литературу, и вше то муши буц повязане же би ми як народ обстали и же бим затримала моїх школярох – щиро заключує наша собешеднїца.
– Увидзиме кельо нарок будзе школярох, а радує ме же ше уж даєдни нови приявели. Поволала бим шицких родичох же би уписали дзеци до руских оддзелєньох и на годзини руского язика, же би ше нам нашо школи нє погашели, же бизме зачували нашу бешеду, културу, обичаї и традицию, же бизме зачували нас – гварела на концу учителька Славица Мали зоз Вербасу.