КУЛА – Новинаром Руского слова, подобно як на прешлей схадзки Скупштини општини Кула, и на нєшкайшей, трецей схадзки нє було дошлєбодзене присуство. Гоч зме урядово и на час глєдали дошлєбодзенє и акредитацию, одвит зме заш лєм нє достали.
Як и потераз, и 9. юния, опрез будинку була поставена ограда, коло хторей стало приватне обезпеченє, полиция и чловек зоз списком хтори нам на питанє чи можеме войсц до сали одвитовал же од новинарох може буц присутна лєм Ку медия, хтора наживо преноши схадзку. На констатацию новинара же зме ше урядово приявели и вимагали акредитацию, иста особа нам совитовала же бизме пошли на перши поверх будинку Општини ґу секретарови СО Кула Милорадови Вуксанови, од хторого зме и глєдали акредитацию прейґ мейлу, и пробовали розришиц проблем. Медзитим, накадзи рушел до будинку, новинарови Руского слова обезпеченє и полиция гварели же нє може войсц. Так же то уж други раз же новинаром Руского слова нєдошлєбодзени уход на схадзку СО Кула.
На схадзки нє були присутни анї 18 одборнїки зоз лїстини „Глас младих општини Кула”, хтори бойкотовали схадзку и сообщели же предлужа бойкот до дальшого.
З оглядом на тото же тройо одборнїки зоз лїстини коалициї „Александар Вучич – Кула, наша фамелия” на прешлей схадзки вибрани на функциї, автоматски им престал мандат одборнїка, та перша точка требала буц потвердзованє мандатох новим одборнїком, цо значи же тота лїстина на початку схадзки мала лєм 16 одборнїкох.
Медзитим, предсидатель СО Кула Велибор Милоїчич до кворуму ураховал и кандидатох за одборнїкох, так же зоз вкупно 19 гласами вигласани шицки точки дньового шора. Схадзка тирвала коло 55 минути, зоз чого було 30 минути павзи. Потвердзени мандати одборнїком Скупштини општини Кула, прилапени предлог Одлуки о анґажованю екстерней ревизиї консолидованого закончуюцого рахунку буджета општини Кула за 2025. рок, предлог Одлуки о вименки и дополнєню Одлуки о финансийней потримовки фамелиї зоз дзецми и злєпшаню условийох за задовольованє основних потребох дзецох при образованю и воспитаню, предлог Одлуки о приношеню вименкох и дополнєньох Плану детальней реґулациї центра Кули, предлог Одлуки о вименки Одлуки о формованю Општинского штабу за позарядово ситуациї, як и предлог Рочней програми защити, ушореня и хаснованя польопривредней жеми за подруче општини Кула за 2026. рок.