РУСКИ КЕРЕСТУР – На желєней поверхносци коло Спортскей гали, як и потераз, першей соботи у юнию, отримана пията Манифестация традицийних руских єдлох „Смаки традициї”, хтору орґанизує Здруженє гражданох „Руска скарбнїца”.
Манифестация и того року позберала красне число нащивительох и любительох традицийних руских єдлох, з тим же кед ше поровна зоз прешлим роком, хибели Ораховчанє и їх надалєко познати паприґаш зоз пупоркох, а з тей нагоди нє були анї госци зоз Земплинскей теплици. Но, и попри тим, нащивителє уж од поладня могли коштовац приготовени руски єдла як цо то наприклад свадзебна сарма, капуста, колбаса у билей мачанки, колачи на жимно, череґи и подобни сладки и слани лакотки.
Акцент тогорочней манифестациї бул на участвованю наймладших у рижних активносцох. У културно-уметнїцкей програми наступели предшколски дзеци зоз „Музичней оводи” под руководительску палїчку Татяни Фейди, дзеци од першей по штварту класу основней школи, такволани „Шкорванчки”, чийо руководителє Кристина Афич и Татяна Фейди, як и дзивоцки бенд „Women power” Дома култури Руски Керестур, чий руководитель Сашо Палєнкаш.
Покля ше родичи мали нагоду ошвижиц за шанком, хтори обезпечели млади зоз Здруженя гражданох „Пакт Рутенорум”, за дзеци того дня були орґанизовани стародавни бависка як цо то обегованє зоз вайцом на ложки, скаканє у мехох и складанє чуткох, а найшвидши и найсхопнєйши достали и медалї. За дзеци тиж були орґанизовани и роботнї зоз цестом и мальованє.
Орґанизатор манифестациї Здруженє гражданох „Руска скарбнїцаˮ, хторе творя Желько Ковач, Таня Арва Планчак и Снежана Сабо Йолич, a отримана є зоз финансийну потримовку спонзорох и донаторох зоз валалу. У орґанизациї помогли и Месна заєднїца Руски Керестур, ЯКП „Руском”, Школа „Петро Кузмякˮ, Здруженє женох „Байкаˮ, Туристичне здруженє Руски Керестур, подприємство „Електромонтажа” як и жени з валалу хтори за материял направели рижни колачи за коштованє.
