ЛАЙДЕН (ГОЛАНДИЯ) – Експериментални документарни филм Ровнїна уметнїка Даряна Гардия зоз Ческей, родом зоз Руского Керестура, достал награду на Europian Short Pitch – углядней европскей програми хтора потримує младих филмских творительох у розвиваню и копродукцию кратких филмох, а хтора того року отримана у Лайдену у Голандиї.
Документарни филм Ровнїна вибрани у катеґориї Work in Progress филмох, односно у фази монтажи, хтори глєда партнерство за закончованє и дистрибуцию, як єден од штирох проєктох зоз цалого континенту. Награду Mastering in Kind додзелєла им белґийска компания The Pack, єдна з водзацих европских постпродукцийних хижох. Награда оможлївює професийну мастеризацию финалного резу филма у їх студию, зоз чим будзе мац найвисши технїчни стандард слики и звука, пред тим як войдзе на фестивалску сцену.
– Творенє филма почало пред двома роками, зоз иншаку идею. То требал буц филм о людзох на валалє, о женох хтори ше на рижни способи ище вше стараю о нашей заєднїци, у чаше кед наш швет випатрал дакус иншак. Медзитим, потим ше случел 1. новембер, хтори велїм з нас, кед нє и шицким, пременєл шицко. Тоти пременки ше одражели и на филм, и формовали го. Знїмани є у Руским Керестуре, Новим Садзе и Беоґрадзе. У нїм нєт диялоґи, алє чуц руски язик – виявел за Рутенпрес автор Дарян Гарди и додал же би любел приказац филм и у Руским Керестуре.
Треба визначиц и же ше проєкти на Europian Short Pitch презентовало пред жирийом и госцами зоз найвизначнєйших шветових филмских фестивалох як цо то фестивал IFFR, Берлинале, Сараєво Филм Фестивал, Go Short и Кански филмски фестивал.
