ВЕРБАС – У Центру за физичну културу „Драґо Йовович” у Вербаше отримана панел дискусия дзе главни теми були женске поднїмательство, виволаня зоз котрима ше жени стретаю у дїловним швеце, як и можлївосци за їх змоцньованє надалєй.
На отриманей подїї участвовали представнїки локалних женских здруженьох, представнїки институцийох и орґанизацийох же би вичерали искуства и промововали успишни дїловни приповедки, а єдни з учашнїцох були представнїци Активу женох КУД „Жатва” зоз Коцура.
О своїх искуствох бешедовали представнїки локалних здуженьох – предсидателька Активу женох зоз Коцура Коцана Колєсар, Стефания Мажич спред Першей месней заєднїци Вербас и Мария Пароци спред КУД „Сирмаи Кароль”. Жени през приклади зоз пракси представели драгу розвою своїх орґанизацийох, препреченя котри превозиходзели на тей драги, алє бешедовали и о можлївосцох за розвой и унапредзенє своєй дїялносци. Учашнїци за тоту нагоду порихтали и богати етно столи на котрих Актив женох представел традицийни руски єдла, покля други представели сербски и мадярски єдла.
Панел реализовани у рамикох проєкту „Моцнєйша як цо думаш – Вона бренд”, а модераторка того дня була позната новинарка и телевизийна водителька Саня Маринкович.
Окрем учашнїкох, присутни бул и покраїнски секретар за привреду и туризем Ненад Иванишевич, як и предсидатель општини Вербас Милан Ґлушац, котри шицких присутних и привитал.
