Рио де Жанеиро будзе домашнї 31. Лєтних олимпийских бавискох хтори буду отримани од 5. по 21. авґуст того року. То город хтори познаме по самби, Копакабани, а ище баржей по добрим фодбалу и фодбалерох. Любителє спорта з нєсцерпеньом очекую початок наявеного спектаклу.
Медиї у швеце уж од тераз преноша позитивни думаня и оцени о Бразилу як домашнього Лєтних олимпийских бавискох. Можебуц оцени таки, бо познате же Бразилци любя спорт, а окрем того, майстрове су за добру атмосферу, маю добри потенцияли, и мож повесц же су спортска нация.
Рио де Жанеиро у еуфориї после одлуки Медзинародного олимпийского комитету же би ше 31. бависка отримали праве там. Конкуренция городох хтори ше кандидовали за орґанизованє Бавискох була моцна. У нєй бул и город Чикаґо, хтори раховал на кредибилитет предсидателя ЗАД Барака Обами, хтори присуствовал на схадзки Комитету. Потим, Токио, хтори мал штири милиярди долари на рахунку, а хтори плановали потрошиц за бависка. Мадрид мал моцни лоби, и вельо маєтних приятельох.
Но, випатра же розум заш лєм надвладал шицки скрити и нє скрити „адути” хтори мали други городи кандидати. Чикаґо випаднул у першей рунди вицагованя, а у другей Токио. У трецей, Мадрид мал барз малу потримовку у одношеню на Рио.
Так Рио достал нову шансу же би врацел стару славу яку мал дакеди, а од преглашеня резултатох Медзинародного олимпийского комитету, Бразил ше почал пририхтовац.
Плановане же ше за орґанизацию и вибудов нєобходней инфраструктури потроши 11 милиярди долари. Уложело ше до вибудови нових авто-драгох, побрежйох, готелох… Такволани „Олимпийни валал” вибудовани у заходней часци Рия, дзе будзе отримана половка спортских змаганьох.
Змаганя буду отримани на осем локацийох. Найзначнєйша – стадион Маракана на хторим ше отрима церемония отвераня и завераня Бавискох, як и финални фодбалски змаганя. На стадиону Жоао Авеланж буду отримани атлетски змаганя, а у националним акватик центру „Мария Ленк” буду отримани ватерполо, и змаганя у плїваню и скаканю до води.
Популарне побрежє Копакабана будзе место дзе буду отримани змаганя у триатлону и волей бичу. Арена ХСБЦ порихтана за змаганя у ґимнастики и у ритмичней ґимнастики. Писта Самбадром порихтана за змаганя у маратонским обегованю и швидким крачаню. У дворани Ґиназио до Мараканзиньо ше буду змагац одбойкаше, а у залїве (лаґуни) Родриґо де Фреитас буду отримани веслацки змаганя.
И нашо спортисти виборели пласман за участвованє на 31. Олимпийних бавискох у Рию у єденац спортох. У нашим тиму 74 спортисти, трицец штири жени и трицец пейцме хлопи.
НОВИ СПОРТИ
На програми 31. Олимпийских бавискох плановани змаганя у 26 спортских конарох и вкупно 39 дисциплинох. Було два шлєбодни места за нови спортски конари. На тоти места конкуровали: бейзбол, софтбол, карате, ґолф, сквош, ролер-спорти и раґби. Дзепоєдни зоз спомнутих буду уключени до програми бавискох.