ОДЖАК – У своєй Розвойней лиґи за младши катеґориї, внєдзелю, 28. априла, млади русиновци, народзени од 2012. по 2016. рок, одбавели пейц змаганя процив екипи зоз Оджаку, процив хторих зазначели два побиди и три пораженя.
Наймладши фодбалере, дзеци народзени 2016. року, страцели з резултатом 5:3, дзе ґоли за свой тим дали – Иван Чапко, Матей Варґа и Лени Хрнчяр, потим наступели рок старши дзеци и домашнїх у Оджаку победзели зоз 8:0, за побиди найвецей допринєсли – Лука Тасич хтори дал 3 ґоли, Марко Еделински и Михайло Шомодї дали по два ґоли, док єден дал и Стефан Такач.
Екипа младих бавячох хтора народзена 2014. року страцела зоз 3:2, а обидва ґоли дал Лука Зелич, док екипа русиновцох хтора народзена 2012. и 2013. року победзела зоз 2:0, та по єден ґол дали Давид Гарди и Тони Колошняї.
Красне нєсподзиванє була и дзивчатска екипа, мишани 2012. и 2013. рок, хтора и попри тим же бавела процив чистей хлапцовскей екипи, зазначела ґол. Успишна у виводзеню була Николина Гарди хтора дала красни евроґол зоз коло 15 метерох, та у случаю дзивчатох, було то ровне побиди.