РУСКИ КЕРЕСТУР – У парохиї св. оца Миколая вчера вишло априлске число Християнского часопису „Дзвони”, а попри друкованого, першираз Дзвони доступни и у онлайн форми на тей адреси.
Редакция ше и на нову форму „Дзвонох” опредзелєла пре позарядови стан и чежшу дистрибуцию друкованого виданя, понеже и нашо церкви заварти за вирних. Онлайн виданє поставене и на Фейсбук боку керестурскей парохиї на адреси Katedrala sv Nikolaja.
У Руским Керестуре, нєшка кед Вельки пияток, пополадню од 15 до 16,30 годзин церква будзе отворена, та предплатнїки и други годни вжац и свой друковани прикладнїк.
Змист априлских „Дзвонох” з векшого пошвецени швету Пасхи, а тиж и актуелней ситуациї хтору жиєме, односно як з духовного боку патриц и прежиц тот чежки час.