ШИД – З нагоди Дзецинского тижня, вчера у Општини Шид бул приєм за представительох школярских парламентох.
Школярох и их наставнїкох, та дзеци з Предшколскей установи „Єлица Станивукович Шиля” прияли заменїк предсидателя Скупштини општини Деян Булатович, началнїк Општинскей управи Ромко Папуґа и руководителька Оддзелєня за дружтвени дїялносци Снежана Бунич.
Школяре домашнїм поставяли питаня, алє давали и предкладаня, як цо то же би за школярох требало зменшац цени уходнїцох на биоскопски и театрални представи, алє и вецей робиц на охрани дзецинских правох.
Наймладши з дзецинскей заградки Булатовичови з тей нагоди придали Грамоту дзецинских правох, хтору сами нарисовали, а вихователяки им помогли написац их права.