БАЧКА ПАЛАНКА – Карате клуб „Русин” участвовал на 33. Мемориялним турниру „Драґан Тот – Тотка” у каратеу у Бачкей Паланки у Спортскей гали „Тиквара”, а нашо каратисти зазначели красни резултати.
На турниру участвовали вецей як 250 змагателє, зоз 21 клуба зоз Сербиї, Румуниї и БиГ.
За КК „Русин” внєдзелю, 7. юлия ше змагали: Иван Планчак, Константин Сабо-Дайко, Кристина Сабо-Дайко, Мелания Малацко, Виктор Шимко, Дамян Венчельовски, Миа Сабо и Ерик Грубеня.
Нашо каратисти були успишни и на тим змаганю, та у катеґориї катох поєдинєчно освоєли 7 медалї, док у катеґориї борбох освоєли два медалї. Биланс медальох шлїдуюци: вкупно освоєне 9 медалї, з чого єдна златна, два стриберни и шейсц бронзово.
Каратистох на змаганю водзели тренере Наташа Ковачевич и Милан Тасич.
Орґанизатор Мемориялного турниру „Драґан Тот – Тотка” у каратеу бул Шотокан карате союз Сербиї и КК „Кизами” зоз Бачкей Паланки.
