РУСКИ КЕРЕСТУР – Матуранти осмей класи основней школи „Петро Кузмяк” вовторок, 9. юния, означели свой матурски вечар.
Вкупно 22 матуранти зоз свою класну наставнїцу Каролину Джуджар ше перше зишли у дворе школи, дзе ше сликовали, а потим вєдно зоз директорку Наталию Будински и другима наставнїцами остатнїраз вєдно вишли зоз керестурскей школи и прешпацирали ше по центер валалу. Там их дочекали родичи и приятелє хтори им винчовали и тоти хвильки овиковичели зоз фотоґрафиями.
Потим ше шицки ознова врацели до школи, понеже у голу була орґанизована пригодна програма на хторей додзелєни дипломи и преглашени школяр ґенерациї. Осмеро школяре зазначели одлични успих, зоз хторих штверо достали Вуково дипломи – Лара Папуґа, Доротея Рамач, Николая Рац и Никола Петкович, хтори преглашени и за школяра ґенерациї.
По законченю програми школяре зоз класну, директорку и наставнїцами свой матурски вечар преславели у школскей єдальнї.