НОВИ САД – Новинско-видавательна установа „Руске слово” нєшка означи свой дзень, интерно у кругу колектива, представнїкох Националного совиту Руснацох, членох Управного одбору, колеґох и пензионерох Установи.
З тей нагоди уручи ше порядни дворочни награди часописох „Заградка” и МАК, а кажди рок дзень фирми пошвецени пензионером НВУ „Руске слово”.
Награду „Заградки”, котра ноши мено „Михайла Ковача”, подзеля мац и дзика Леа и Анамаря Ранкович, котри вєдно пишу рубрику у часопису за дзеци. Награда мултимедиялного часпису за младих МАК додзелї ше ґрафичней дизайнерки и илустраторки Анї Гудак Заґоричник.
Дзень фирми означує ше кажди рок штредком юния, кед 15. юния 1945. року вишло перше число новинох „Руске слово”. Од теди установа розвила ище шейсц дїялносци: Часопис за дзеци „Заградка” порушани 1947, авторске видавательство кнїжкох руских авторох розпочане 1961, Часопис „Шветлосц” почал виходзиц 1952, Часопис за младих МАК – 1972, дньова Информативна аґенция и сайт 2006, а Документацийни центер „Руского слова” основани 2020. року.