Єдна зоз бридких сликох на наших улїцох то винїманє шмеца зоз контейнерох – людзе на бициґлох з кочиками обиходза места дзе ше находза контейнери и канти з одрудками и винїмаю тото цо думаю же можу похасновац. Же би ше зменшал проблем, за тих цо им потребна ґардероба и пожива, ширцом Войводини и Сербиї порушана акция квачки доброти, на котрих ше охабя мещки з тима артиклами. За пластични фляши, папер, метали, ище вше нєт прави ришеня.
Же би людзе, хтори пре рижни причини нє можу на иншаки способ дойсц до поживи и облєчива, нє шпиртали по контейнерох и кантох за одпад, комушик пришло на розум же би ше монтирали квачки доброти, и же би ше на нїх кладло мещки зоз чисту и здраву поживу, чисти шмати, воду… и охабяли их тим котрим то потребне.
У Сербиї акцию запровадзела єдна дзивка зоз Портуґалиї котра пришла до Беоґраду орґанизовац креативни роботнї. Кед поставели даскельо квачки, такой то фотоґрафовали и информацию обявели на дружтвених мрежох, насампредз на Фейсбуку. То такой дало перши
резултати – акция ше ширела як шашка. Тераз, велї места у Войводини и Сербиї маю квачки доброти.
ГУМАНА САЛАЙКА
После Беоґраду, акция зажила и у Новим Садзе. Иницияторе були Лїляна Орлич и Ґоран Станоєвич, котри перши заквачели квачки и обявели у явносци.
– Велїм людзом потребна помоц. Нє треба обрацац главу од нїх, напроцив, потребна им помоц. Треба шицки же бизме похопели же велї ствари завиша од нас, а нє же бизме чекали на других. Як поєдинци вельо можеме зробиц, а у колективе вельо того ше назбера – гвари
Лїляна Орлич, єдна од иницияторох.
Перши квачки положени на Булевару Михайла Пупина, потим при Сайму, на Булевару Краля Петра…
И на углу Карадьордьовей и Доситейовей улїци положени квачки доброти. Находза ше медзи хижами и даскелїма будинками зоз квартелями, гоч нє на барз обточним, алє на видним месце. Людзе дзечнє охабяю поживу и облєчиво, алє исто так беру их тоти котрим то треба.
– Звичайно нам вше останє поживи. Скорей сом то кладла на контейнери, або на канти кед зоз нашей улїци одноша шмеце, а тераз то вельо лєпше ришене. Чистейше и кельо-тельо гиґиєнски. Дакеди єст вецей мещки на квачкох, а дакеди заш, преходзим и длуго нє видзим нїч, та вец сама патрим же бим дацо принєсла – гвари Мария Фелбаба, осемдзешатрочна Салайчанка.
ЖАБЕЛЬСКИ ПРЕДЛОГ
У Жаблю ше зявели даскельо места на котри ше квачи мещки зоз гуманитарну помоц. Акция зажила, медзитим у Центру за социлну роботу, компетентни нє одушевени зоз тоту акцию.
– Квачки доброти гумани ґест и наисце верим же з тим рухом гражданє жадаю помогнуц. Медзитим, було би гуманше кед би помоц котру ше охабя на квачки доброти, придали орґанизацийом и здруженьом котри ше стараю о гражданох котрим така помоц потребна, а таких у Општини Жабель єсц вецей. Податок у державней социялней системи о хасновательох социялней помоц тайна, бо законодавец думал же хасновательови можебуц будзе нєприємно кед би то було явне и кед би то шицки знали. Зоз придаваньом помоци орґанизацийом або здруженьом, тот факт би виостал – гварел єден заняти у системи за социялну защиту Општини, и праве прето жадал остац анонимни.
УПРЕКОСНИ И ЗЛОНАМИРНИ
Нажаль, лєм даскельо днї од початку акциї, гулиґанє почали старговац квачки. Гоч квачки нє драги, гоч их мож импровизовац на рижни способи, то ище єдно упрекосценє и тим цо даваю, и тим цо то хасную. Алє, якция тирва.
Нє треба чекац на других, треба же бизме сами були иницияторе, цо наисце нє чежко. Лєм кус вецей анґажованосци и здогаднуц ше же дахто нє ма, а ми му то можеме обезпечиц.
ЗА ДОБРУ ДЗЕКУ НЄ ТРЕБА ВЕЛЬО
За поставянє квачкох нє потребне вельо – досц лєм єден фоґаш, дещичка зоз гвоздами заквачена на видне место, квачки з дроту… Тамаль кадзи преходза вельо людзе, и напис–информация, же би ше знало о чим ше роби. Гоч ше досц о тим приповеда и пише, єст ище полно таких котри за акцию нє знаю.
Исто так, потребне звикнуц и людзох же би роздвойовали шмеце од дачого цо мож похасновац и цо ше дакому зда, и место дзе ше то охабя, и дзе людзе у потреби тото можу найсц.