ВЕРБАС – Дзень побиди, 9. май, вчера у Вербаше означени з покладаньом венцох на вецей локацийох у городзе. Венци положени на памятнїк жертвом фашизму у центре городу, на памятнїк погинутим червеноармейцом и погинутим у войнох у бувшей Югославиї од 1992. по 1999. рок.
Венци положели делеґациї Општини Вербас, представителє СУБНОР-у, делеґация Здруженя сербско-русийского приятельства „Род”, делеґациї Сербскей напредней странки, Социялистичней партиї Сербиї и Партиї зєдинєних пензионерох Сербиї.
У своєй бешеди, заменїк предсидателя Општини Милан Ґлушац здогаднул на вредносци шлєбоди и антифашистичного руху, а културно-уметнїцку програму у центре городу пририхтали школяре Основней школи „20. октобер” з Вербасу.