ВЕРБАС – Гайзибанска драга од Вербасу по Зомбор нє будзе утаргнута – гварел вчера член Општинскей ради Вербас Ґоран Пейович за портал Општини Вербас, понеже ю „Инфраструктура желєзнїци” видвоєла зоз списку драгох на хторих престава желєзнїцки транспорт.
Як потолковал, така одлука принєшена после вецей схадзкох представительох општинох Вербас и Кула и Городу Зомбор з представителями „Инфраструктури желєзнїци”, на хторих винєшени числени причини на хасен дальшей активносци тей драги. Як найважнєйши визначене же ю, попри путнїкох, хасную и вецей привредни субєкти з того реґиону, дзе, як поведзене, Цукровня у Червинки аж и технолоґийно зависна од тей драги.
Пейович тиж гварел же у датим понукнуцу з „Инфраструктури желєзнїци” локалним самоуправом о пребераню управяня з гайзибанскима драгами єст надосц нєясносци и вельо питаня, насампредз о тим же хто би ше конкретно старал о драгох и тото финансовал, о чим спомнути општини и город поинформовали и Покраїнски секртетарият за енерґетику, будовательство и транспорт, а потим орґанизовани и сход представительох локалних самоуправох и Желєзнїци.
На велї питаня ище нє достати одвити и толкованя, алє за тераз, локалним самоуправом Вербасу, Кули и Зомбору ше удало же би гайзибанска драга Вербас-Зомбор и надалєй функционовала.