НОВИ САД – На нєдзелю, 17. септембра, безплатни здравствени препатрунки буду орґанизовани и у поликлинїки Клинїчного центру Войводини, на оддзелєню ортопедиї у амбулантох 9, 10 и 11, як и у Шпиталю у Зомборе.
Як и у шицких 58 общих шпитальох и трох поликлинїкох у Сербиї, безплатни препатрунки ютре буду од 8 до 16 годзин, а гражданє годни вимерац кревов прицисок, уровень цукру у креви, ЕКҐ, тїлесну чежину и друге. По препатрунку од лїкарох достаню совити.
На препатрунок можу присц и гражданє котри нє маю здравствену кнїжочку, односно карточку.
Министер здравства Златибор Лончар гварел же од 17. септембра кажди треци тидзень у мешацу будзе запровадзена пракса безплатних здравствених препатрункох за шицких гражданох, перше у общих шпитальох и клинїчних центрох, а познєйше и у домох здравя, же би ше цо скорей препознало евентуални хороти при гражданох.