НОВИ САД – У шедзиску Завода за културу войводянских Руснацох у Новим Садзе вчера вечар отримане Стретнуце з Дюром Латяком, з хторим на прикладни способ, Завод розпочал нови календарски рок.
Дюра Латяк наш визначни и длугорочни дружтвено-политични роботнїк и дїяч у култури, актер и хронїчар найзначнєйших подїйох у явним живоце Руснацох у другей половки ХХ вика, нєшка найактивнєйши як публициста широких и рижнородних интересованьох.
Медзитим, з тей нагоди, у фокусу Стретнуцох хтори у нєформалней атмосфери модеровал директор Заводу Саша Сабадош бул Дюра Латяк як творитель, уметнїк и особа. Бешедовал о своїх початкох у уметнїцкей литератури, ґлуми, и окреме музики, як и о особних памяткох, фамелиї и приятельствох.
Латяк вєшенї наполнєл 90 роки, алє и нєшка дисциплиновано роби кажди дзень – чита, виглєдує, пише, гоч припознава же кус зменшал темпо бо муши примерковац на здравє.
Кед слово о чечуцих подняцох, фокусовани є на виглєдованю градзи и материялох о Костельникови и контексту у хторим написал Граматику бачваньско-сримскей бешеди и кодификовал наш литературни язик. Ма пририхтани рукопис интересантней студиї о руских шпиванкох на пожичени мелодиї хтори скорей покус нєсправедлїво були видрилєни з нашого фолклору. Ґу тому, за друкованє пририхтана його моноґрафия з нагоди 50-рочнїци руского Театру, а особнє би любел закончиц давно розпочати роман „Тополя”, як и зредзиц писнї хтори писал ище як леґинь…
Публика у Заводзе, од хторих велїм Латяк дараз бул надредзени, ментор лєбо сотруднїк у подїйох и подняцох хтори нєшка маю нєоспорне значенє за руску заєднїцу, през анеґдоти и здогадованя потвердзела слику о вредному, (пре)анґажованому и одвичательному роботнїкови хтори общи интерес часто кладол и опрез здравя и приватного живота. Пре шицко спомнуте, Дюра Латяк на концу програми достал спонтани и щири аплауз.
