БЕОҐРАД – На вчерайшим представяню Штвартого звиту о запровадзованю Акцийного плану за витворйованє правох националних меншинох у Сербиї, о.д. директора Канцелариї за людски и меншински права Сузана Паунович визначела же то Звит за други квартал 2017. року, як и же ше нєпреривно провадзи витворйованє активносцох з того плану, сообщене з Канцелариї.
На сходзе з нагоди представяня Звиту присуствовали коло 60 учашнїки – представителє державних орґанох и институцийох, представителє националних совитох националних меншинох у Сербиї, нєзависних целох и медзонародних орґанизацийох, а спред Националного совиту (НС) Руснацох на схадзки присуствовал предсидатель Вивершного одбору НС Желько Ковач.
Пануновичова гварела же спомедзи 74-ох ношительох активносцох за запровадзованє Акцийного плану 13 нє доручели свойо прилоги, медзи нїма и 7 национални совити, як и же за спатрани период витворени, лєбо ше успишно витворює 63 одсто активносцох.
Як гварела Пауновичова, у Звиту и податки о активносцох на локалним уровню, бо до процесу даваня звитох уключени и 76 єдинки локалней самоуправи и 53 совити за медзинационални одношеня на локалним уровню. Як констатоване, дзекуюци дотерашнїм обуком злєпшани квалитет самого даваня звитох о запровадзованю Акцийного плану, а у тим мешацу тиж буду орґанизовани вецей обуки ширцом Сербиї за контакт-особи з єдинкох локалней самоуправи. Визначене же прейґ потримовки шицким котри участвую у процесу даваня звитох, Канцелария роби на унапредзеню системи провадзеня витворйованя Акцийного плану.
Державни секретар у Министерстве державней управи и локалней самоуправи Иван Бошняк присутних упознал з активносцами того министерства, як и же ше роби на вименкох и дополнєньох Закона о защити правох и шлєбодох националних меншинох и Закона о националних совитох националних меншинох, а у сотруднїцтве з националнима совитами.