БЕОҐРАД – Министерка просвити Славица Дюкич Деянович вовторок, 23. априла на шветочней академиї „Учитель Доситей” у Народним театру у Беоґраду уручела повелї котри ноша мено того просвитителя установом и поєдинцом за посцигнути доприношеня у просвити у 2023. року. Єдна зоз трох основних школох на териториї Републики Сербиї котри достали Повелю „Доситей Обрадович” и Основна школа „Братство єдинство” зоз Коцура, и єдна є зоз 14 наградзених у розличних обласцох и катеґорийох.
Коцурска Основна школа мала чесц достац Повелю пре участвованє школи и єй занятих у програмох и проєктох дзе зазначели значни резултати, пре квалитет настави, ученя и воспитней роботи, пре приклад добрей пракси и успишне медзинародне сотруднїцтво наставнїкох и школярох.
По сообщеню Министерства просвити, Основна школа зоз Коцура приклад добрей пракси, чому шведоча числени припознаня котри у предходним периодзе достали школяре, алє и наставнїки зоз тей школи.
Директорка коцурскей Основней школи Сенка Мученски котра прияла Повелю „Доситей Обрадович” подзековала шицким котри допринєсли тому же би Школа заслужела таке значне припознанє, а як визначела, зоз шицкима моцами ше буду намагац предлужиц унапредзованє квалитету роботи установи.
