БЕОҐРАД – На вчерайшим представяню першого звиту о запровадзованю Акцийного плану за витворйованє правох националних меншинох у Сербиї директорка Канцелариї за людски и меншински права Сузана Паунович гварела же скоро 80 одсто активносцох з Плану уж подполно витворени за шейсц мешаци.
Як гварела Пауновичова, 67 розлични институциї Канцелариї доручели звити о поробеним на запровадзованю Акцийного плану, так же вон „нє мертве слово на паперу” и же активносци на його витворйованю иду з плановану динамику.
Державни секретар у Министерстве правди Чедомир Бацкович гварел же и национални совити националних меншинох и медзинародна явносц задовольни з Акцийним планом и його запровадзованьом и здогаднул на значенє Плану за Поглавє 23 у прегваркох Сербиї о приступаню ґу ЕУ.
На представяню витворйованя Акцийного плану бешедовал и амбасадор ОЕБС-у у Сербиї Андреа Орацио, котри наглашел значенє и добри резултати Плану, як и важносц защити националних меншинох у єдней модерней держави.
Спред Националного совиту Руснацох на вчерайшим сходзе у Палати „Сербия” у Беоґрадзе присуствовали предсидатель Вивершного одбору Желько Ковач и секретар Совиту Таня Арва Планчак.
