РУСКИ КЕРЕСТУР/НОВИ САД – Школяре хтори у Новим Садзе ходза на виронауку нє лєм у грекокатолїцкей парохиї св. апостолох Петра и Павла, алє и у своїх школох, на Крачун були зоз вироучительками с. Винкентию и Меланию Римар у Руским Керестуре винчовац тото вельке швето народзеня Исуса Христа. Зоз колядами радосц однєсли на парохию, потим до манастира ч. шестрох Служебнїцох и до манастира Малих шестрох, а нащивели и просториї Националного совиту, дзе зоз даскелїма крачунскима шпиванками подзековали за учебнїки виронауки и за пестованє руского язика, хтори им каждого року обезпечує Одбор за образованє Националного совиту Руснацох.
Шпивачох на гармоники провадзел и помагал им шпивац новосадски дзияк Йовґен Надь.
Тота виронаучна ґрупа дзецох и у Новим Садзе на други дзень Крачуна ходзела по шпиваню. Так були у пароха, потим у дзияка и ище даєдних фамелийох, а окремне дожице им було колядовац нашому епархови Георгийови хтори их дочекал з вельку радосцу.
