РУСКИ КЕРЕСТУР – У Руским Керестуре нєшка почина Медзинародни волонтерски камп „Summer in Ruski Krstur 2016” („Лєто у Руским Керестуре 2016”) и тирва по 17. юлий. Камп орґанизує Туристичне здруженє „Руски Керестур”, а з финансийну потримовку Роботного цела за младеж Националного совиту Руснацох и Општини Кула. И того року Камп будзе мац вельку потримовку од Каритасу, Месней заєднїци Руски Керестур и ЯКП „Руском”.
На Медзинародним волонтерским кампу участвую волонтере з Французкей, Нємецкей, Турскей, Горватскей, волонтере зоз Сербиї и Керестура, а буду робиц на вецей местох у валалє.
Окрем роботней часци, акцент Волонтерского кампу того року будзе на представяню мултикултуралносци у Войводини през традицийни єдла пейцох народох – Руснацох, Мадярох, Словацох, Українцох и Сербох, а окрем лидерки Кампу Дорис Бучко, у тей часци з волонтерами будзе робиц и Любица Няради.
У витворйованю каждого Волонтерского кампу вельку учасц ма и локална заєднїца, та орґанизаторе поволую шицких котри то можу же би подаровали єдзенє за костиранє волонтерох.
Пре помоц у поживових артиклох мож ше явиц Дорис Бучко, на число телефона 062/88 97 128.