РУСКИ КЕРЕСТУР/ЗЕМПЛИНСКА ТЕПЛИЦА (СЛОВАЦКА) – Школяре осмих класох Основней школи „Петро Кузмяк” з Руского Керестура нєшка, 9. януара, одходза до Словацкей, до Земплинскей Теплици, на ткв. Жимску школу, дзе буду по штварток, 12. януара.
Одход 31-ого школяра и троїх просвитних роботнїкох до дакедишнього Керестура у восточней Словацкей орґанизує Национални совит (НС) Руснацох, у сотруднїцтве зоз Школу „Петро Кузмяк”, Местом Земплинска Теплица и тамтейшу ОШ. У трошкох путованя и пребуваня участвовали и родичи школярох з по 6 000 динари, а осиґуранє за дзеци у цалосци зноши НС.
Як гваря у НС, на орґанизованє Жимскей школи за керестурских основношколцох ше одлучело прето же єдино вони од НС нє доставаю нїяки стимулациї, алє и пре потвердзованє и предлужованє доброго сотруднїцтва медзи Руским Керестуром и Земплинску Теплицу.
Попри друженя з домашнїма школярами, Керестурци у Земплинскей Теплици буду мац и заєднїцки роботнї зоз своїма парняками, єдни другим представя свойо школи, а плановане и упознаванє з историю того краю, так же нащивя и Кошице и Требишов.
Зоз школярами и просвитнима роботнїками у мено НС до Земплинскей Теплици одходзи предсидатель Вивершного одбору Желько Ковач.