РУСКИ КЕРЕСТУР – Фестивал алтернативней музики „Водова фест”, после даскелїх рокох отримованя у Школско-спортскей гали, того року ознова будзе отримани на базену у Руским Керестуре.
Фестивал будзе тирвац два днї, 17. и 18. юлия, будзе мац два бини, на главней буду наступац алтернативни бенди а на електро стейджу буду наступи ди-джейох. Уход на фестивал того року будзе безплатни.
Медзи наявенима виводзачами находза ше беоґрадски панк бенд „Йорґовани”, кросовер бенд хтори комбинує хип-хоп, хард-рок, метал и реґе „Исказ” зоз Панчева, алтернативни кавер бенд „Осми дзень” зоз Нового Саду, як и ди-джейове Мрле, Ками, Контакт, Дроп Сенсеи и други.
Зоз керестурских ґрупох наступя дзивчата зоз бендом „Women power” Дома култури Руски Керестур и бенд „Мацерово мушкатли”.
Фестивал орґанизовани у сотруднїцтве зоз Здруженьом гражданох „Пакт Рутенорум”, а медзи иншим потримали го Општина Кула и Туристична орґанизация општини Кула.