КУЛА – У Ґалериї Културного центру у Кули вчера, 8. фебруара вечар отворена самостойна вистава подобових роботох нашого визначного подобового уметнїка, педаґоґа, алє и писателя Силвестера Макая (1941) з Коцура. Тота, уж трицец шеста Макайова самостойна вистава, у Кули будзе тирвац до конца фебруара, а з тей нагоди виложени прейґ трицец малюнки на рижни теми и портрети, як и шейсц скулптури.
З инспиративнима словами похвали и подзекованя Силвестерови на його подобовей и педаґоґийней роботи, виставу отворела його младша колеґиня, академска малярка и подобови педаґоґ Лидия Барна з Кули, а пред тим о Макайовей творчосци бешедовал и предсидатель „Ателєя 05” з Вербасу Драґан Симич. Як гварел, Силвестер и його супруга Серафина визначни члени спомнутей ґрупи „Ателє 05”.
На отвераню вистави, на хторей присуствовали почитователє Силвестеровей роботи з Кули, Руского Керестура, Коцура, Вербасу и Нового Саду, як и члени його найблїзшей фамелиї, присутних привитала руководителька Ґалериї кулского Културного центру Снежана Давидович, а Серафина Макаї пречитала Силвестерову писню „У Моцартовим доме” з його литературней збирки „Ступа”, обявеней по сербски.
Присутни спомнуту кнїжку, з подписом автора, достали на дарунок, а на концу и Силвестер Макаї шицким подзековал на красних словох о його творчосци и на вираженей потримовки.