РУСКИ КЕРЕСТУР – Штварти Екуменски фестивал духовней музики „Емаус фест” почал всоботу, 13. юлия у виронаучней сали керестурскей парохиї зоз трибину наволану „Як музика уплївує на духовни живот?”.
Учашнїки трибини були дириґентка и просвитна роботнїца професорка Александра Ґарунович зоз Сримскей Митровици, дириґентка и просвитна роботнїца мр Леонора Судї зоз Банскей Бистрици (Словацка Република), кантавтор мр Кристиян Салихович зоз Сараєва и уметнїцки руководитель и дириґент Александар Планкош зоз Руского Керестура.
Модератор програми бул Михаїл Римар, хтори през добре обдумани питаня водзел розгварку зоз учашнїками, а його собешеднїки зоз числену публику подзелєли свойо искуства и становиска о повязованю музики зоз духовносцу и обратно.
После преподаваня направена павза, та за шицких присутних у порти бул орґанизовани полудзенок.
Интересантне и инспиративне преподаванє, наволане „Диялоґ зоз музику”, у виронаучней сали потим отримала и андраґоґа Снежана Павлович зоз Беоґраду, хтора зоз вельку и щиру емоцию бешедовала о историї музики, рижних вариянтох церковних шпивох и о тим як вона уплївує на кажду сферу живота, зоз акцентом на духовни живот.
