РУСКИ КЕРЕСТУР – Тогорочни 65. Фестивал рускей култури „Червена ружа” почина на пияток, 26. юния, и будзе тирвац два днї, односно по соботу 27. юний. Фестивал будзе отримани на лєтней бини у Школи „Петро Кузмяк”, а патрачом и того року буду понукнути богати змисти.
Фестивал почнє на пияток, на 19 годзин, зоз Змаганьом за найкрасши глас на хторим заплановани 10 наступи у провадзеню Народного оркестру Юлиян Рамач Чамо.
Истого вечара, на 20 годзин, будзе Змаганє нових композицийох у забавним духу, а того року публика послуха дзевец нови шпиванки хтори виведу нашо афирмовани шпиваче у провадзеню забавного Фестивалского оркестру.
Перши вечар Фестивалу будзе закончени зоз ревиялну часцу хтора того року будзе пошвецена нашому визначному музичарови Юлиянови Рамачови Чамови, з нагоди 40 рокох як почал робиц у Доме култури Руски Керестур, а дзе охабел тирваци творчи шлїд. У тим сеґменту програми наступя дакедишнї Чамово сотруднїки аматере зоз першей и познєйших поставох оркестрох хтори вон водзел, а буду виведзени даскельо його композициї.
Шлїдуюци дзень Фестивалу, собота, предвидзена за програму за наймладших Червене пупче, хторе почнє на 18 годзин. Програму отвори дзецински хор Шкорванчки хтори будзе провадзиц наступи солистох, а того року у змаганю за найлєпшу нову дзецинску шпиванку приявени осем нови композициї. Познєйше, у ревиялней часци, публика учує пейц шпиванки хтори будзе провадзиц керестурски бенд Woman power.
Понеже того року Одгуки ровнїни нє буду, за остатнї сеґмент Фестивалу заплановани наступи пейцох фолклорних ансамблох зоз вецей наших местох, хтори наступя од 20 годзин.
На концу каждого вечара, коло Спортскей гали, будзе музика за друженє и розвагу, та пияток наступи домашнї Касиус бенд, а на соботу даскелї члени тамбуровей оркестри керестурского Дома култури.
Орґанизатор Фестивалу Дом култури Руски Керестур, софинансиєре – Општина Кула, Национални совит Руснацох, Министерство култури и информованя Републики Сербиї и Покраїнски секретарият за културу, явне информованє и одношеня з вирскима заєднїцами, а по першираз того року, як форму спонзорства, додатни средства поглєдує ше и прейґ такволаней Crowdfunding платформи Добри дабар, а прейґ хторей поєдинци або орґанизациї можу ище вше уплациц донациї.