ШИД – У порти Лєтней владическей резиденциї всоботу, 20. юния отримани фестивал тамбурових оркестрох „Мелодиї Руского двору”, змагали ше осем оркестри.
Спрам гласох публики, гласало 148 нащивительох, перше место зоз 34 гласами освоєл оркестер „Юлиян Рамач Чамо” Дома култури з Руского Керестура, други бул, зоз лєм гласом менєй 33, оркестер КПД „Тарас Шевченко” зоз Дрюрдьова, а треци оркестер КУД „Гавриїл Костельник” зоз Кули хтори достал 20 гласи.
На фестивалє ше змагали и оркестри домашнїх КПД „Дюра Киш”, потим КУД „Осиф Костелник” з Вуковару, Горватского културно-метнїцкого дружтва „Шид”, КУД „Яким Гарди” з Петровцох и КПД „Карпати” з Вербасу.
Присутних привитал предсидатель Националного совиту Руснацох Стеван Самочета и пожадал же би ше и надалєй пестовало руску културу и традицию у тей часци Сриму, а з минуту цихосци дата чесц Миломирови Шайтошови, Веняминови Бульчикови и Вери Петрович.
У ревиялней часци фестивала наступела шпивацка ґрупа „Руски соловеї” зоз Сримскей Митровици и Шпивацка ґрупа КПД „Дюра Киш” з венчиком популарних сербских народних шпиванкох, а по руски як солиста шпивал Ириней Папуґа.
Резултати гласаня публики сообщел предсидатель Скупштини КПД „Дюра Киш” о. Владимир Еделински Миколка и найлєпше пласованим придал пригодни дарунки.
Як провадзаци змисти фестивалу у Лєтней владическей резиденциї отворена вистава малюнкох малярки Андєлки Античевич з Беркасова, хтора виложела 30 малюнки, а тиж були у порти резиденциї порихтани етно штанди здруженя женох зоз Шиду, Бикичу, Беркасова и Ямени.
