ШИД – Початком того мешаца, 3. октобра, у Шидзе у 90. року живота умарла учителька у пензиї Ксения Сенка Саламон, дакедишня нє лєм учителька, алє и културни и дружтвени роботнїк Руснацох у Шидзе и Сриме.
Ксения Саламон (дзивоцке Югас), народзена 27. октобра 1928. року у Бачинцох, дзе закончела основну школу,а ґимназию и учительску школу закончела у Осиєку.
Як учителька перше робела у Истри и у Петровцох, потим у Шидзе, же би 1952. року, вєдно зоз супругом Янком, тиж познатим учительом и нашим културно-просвитним роботнїком, штири роки робела у Коцуре.
До Шиду ше Саламоново врацели 1958. року, дзе у просвити робели по одход до пензиї, и обидвойо були барз анґажовани у КПД „Дюра Киш“. Учителька Ксения водзела фолклорну секцию, єй супруг Янко, котри бул и помоцнїк директора ОШ „Сримски фронт“, водзел драмску секцию, так же з дзецми успишно наступали на наших найвекших фестивалох и на других манифестацийох у Сриме и наших местох.
Член Дружтва за руски язик, литературу и културу Ксения Саламон була од 1975. року и добитнїца є Припознаня Дружтва за заслуги у образованю и просвити „Осиф Фа учитель“, хторе єй додзелєне 2016. року у Руским Керестуре, а придате 2017. року у Шидзе.
Учителька Ксения велї роки була активна и у шидскей парохиї и церкви Преображеня Господнього, дзе була и на чолє Ружанцового дружтва и зберала жени на нєдзельово пополадньово молитви.
Ксения Сенка Саламон похована 4. октобра на грекокатолїцким теметове у Шидзе. Най єй будзе вична памят.