ШИД – Предсидатель Општини Шид Предраґ Вукович, зоз сотруднїками, вчера 24. авґуста, нащивел Основну школу „Сримски фронт” у хторей у цеку роботи на ґенералней реконструкциї будинка.
Предсидатель Вукович ше прешвечел же роботи, хтори виводзи доо „ҐАТ” з Нового Саду, а финансує Канцелария за явни инвестициї Влади Сербиї у виносу од коло 50 милиони динари, напредую по предвидзеним планє.
Пре роботи хтори буду тирвац 90 роботни днї, школяре тей школи буду наставу слухац у других школских будинкох у городзе. Висши класи, од пиятей по осму, буду ходзиц до Ґимназиї „Сава Шуманович” и то од 14 годзини, а настава почнє поряднє 1. септембра.
По словох директорки ОШ „Сримски фронт” Сладяни Любоєвич, за школярох од першей по штварту класу настава почнє на пондзелок, 4. септембра, пре шветочни приєм першокласнїкох, а до ОШ „Бранко Радичевич” будзе их превожиц автобус на наставу хтора будзе починац на 13,30 минути.
