ЗЕМПЛИНСКА ТЕПЛИЦА (СЛОВАЦКА) – Школяре осмей класи з рускокеретурскей Основней школи „Петро Кузмяк” пондзелок, 9. януара вечар добре допутовали до Земплинскей Теплици у Словацкей, дзе пребуваю на кратшей Жимскей школи, у орґанизациї Националного совиту Руснацох.
Домашнї школяре и просвитни роботнїки з Основней школи у дакедишнїм Керестуре у Восточней Словацкей их барз сердечно дочекали и уж на привиту и першим стретнуцу за госцох пририхтали кратшу пригодну програму, дознава Рутенпрес од наставнїци Лидиї Пашо, єдней з просвитних роботнїкох котра зоз 31 школяром з нашей Школи у Словацкей.
Керестурци вчера нащивели Гумене, у нїм замок и познати Вигорлатски музей, вечар школяре зоз Земплинскей Теплици госцох з окремну презентацию упознали зоз Словацку и Кошицами (З. Теплица у Кошицким самоуправним краю), а Керестурци домашнїх зоз Сербию и Руским Керестуром. Друженє дзецох предлужене у диску у Школи.
Нєшка, вєдно з домашнїма, школяре нащивя Кошице, други город по велькосци у Словацкей, а хтори 2013. року бул и Европска престолнїца култури.
Нашо школяре зоз Словацкей до Руского Керестура рушаю на ютре.
