ЖАБЕЛЬ – Пияток, 6. януара, у Жаблю отримани спомин жертвом мадярскей Рациї, хтора була 1942. року у южней Бачкей. У тим месце за седем днї позабивани вецей як 660 особи.
По Служби у жабельскей церкви, у дворе Општини, на месце дзе страдали жителє Жаблю, отримани и спомин тедишньому архиєрейскому намеснїкови Сербскей православней церкви, протоєрейови Милошови Катичови и єрейови Георгийови Живанови, котрому одкрита и спомин-плоча.
На спомину була и подпредсидателька Скупштини АП Войводини Снежана Седлар, делеґация Покраїнского секретарияту за културу, явне информованє и одношеня з вирскима заєднїцами, на чолє зоз секретаром Мирославом Штаткичом, котри гварел же Покраїнска влада, у сотруднїцтве з Епархию Бачку, кажди рок будзе означовац рочнїцу Рациї у шицких местох у хторих ше збуло тото злодїйство.
Венци, медзи нїма и предсидателя Општини Жабель Чедомира Божича, положени и на побрежє Тиси, на такволаним „Чарним мосце” – на месце дзе привожени и руцани под ляд жабельски жертви Рациї.
