НОВИ САД – Тих дньох вишло треце тогорочне число часопису за литературу, културу и уметносц „Шветлосц”, найстаршого часопису такого профилу при Руснацох у Сербиї, хтори видава НВУ „Руске слово” з Нового Саду.
На бокох уметнїцкей литератури обявени циклус писньох Татяни Беук-Латяк и прозни записи Мирона Жироша.
У рубрики „Зоз шветовей литератури” вишло двацец седме предлуженє першого интеґралного прекладу Старого завиту на руски язик, котри зоз старогреческого преложел др Янко Рамач, а тиж и проза Ернеста Томпсона Сетона „Лобо – Краль Карампоа”, хтору з анґлийского пририхтал Юлиян Пап.
З обласци науки о литератури часопис обявює перше предлуженє роботи Марини Кухар „Типолоґия женских подобох у рускей литератури”.
Шлїдзи рубрика „Воспитанє и образованє”, у хторей вишло треце предлуженє студиї др Якова Кишюгаса „Стратеґиї воспитаня”.
Рубрика „Рочнїци – ювилеї” обявює два роботи: „Два и пол столїтия першей грекокатолїцкей церкви у Коцуре” Миколи М. Цапа и „Дюра Варґа – особа за паметанє” Дюри Латяка.
„Статї и есеї” приноша „Звит конкурсней комисиї за нови драмски тексти”, а вец шлїдзи „Библиоґрафия роботох академика Юлияна Тамаша (2006-2015)” мр Наташи Белич.
„Прикази, критики, рецензиї” представяю нови кнїжки Агнети Бучко Папгаргаї, Юлияна Папа и Михала Цоцулї, о хторих пишу Олена Планчак-Сакач, Мария Дорошки и Блажена Хома-Цветквич.
„Драмски додаток” виполнює драма „Белава принцеза” Сашу Палєнкаша, першонаградзени текст з Конкурсу за нови драмски тексти, хтори вєдно розписали РНТ „Петро Ризнич Дядя”, НВУ „Руске слово”, Завод за културу войводянских Руснацох и Национални совит Руснацох. Число илустроване з малюнками Серафини Макаї.