ШИД – Всоботу, 23. юлия пополадню, на грекокатолїцким теметово у Шидзе поховани учитель, писатель и културно-просвитни роботнїк Василь Мудри, котри ше упокоєл пияток 22. юлия у 87. року живота.
Одпитуюци ше од Василя Мудрия парох шидски о. Михайло Режак визначел же Мудри з родного Дюрдьова пришол до Сриму, перше до Бикичу, а потим до Шиду, дзе вєдно зоз супругу, учительку Меланию, научел читац и писац числени ґенерациї школярох.
Як наглашел о. Режак, учитель Василь писал за дзеци, а цали час, уж и кед бул у пензиї, бул активни и у КПД „Дюра Киш” и зохабел моцни творчи шлїд медзи Руснацами, окреме на тим просторе.
Попри найблїзшей фамелиї, на остатню драгу учителя Василя випровадзели и його дакедишнї школяре, просвитни роботнїки, представителє КПД „Дюра Киш” и КПД „Иван Котляревски” з Бикичу, представителє Секциї Дружтва за руски язик, литературу и културу, чиєй роботи, як и роботи цалого Дружтва, дал вельке доприношенє, та його почитователє.