ШИД – Предсидатель Општини Шид Предраґ Вукович, його заменїк Зоран Семенович и предсидатель Скупштини општини Шид Велимир Ранисавлєвич, зоз сотруднїками, вчера прияли представнїци японскей нєвладовей организациї ЄН (JEN) Кеико Кияма и Мияко Хамасака, та Кеико Хонду з Министерства вонкашнїх дїлох Япону, Кай Куримото и Биляну Ґлишович, координаторки проєкту за основни потреби жительства у Сербиї и у Чарней Гори з Амбасади Япону у тиж жемох.
Предсидатель Вукович подзековал Амбасади Япону и японскому народу на дотерашнїх донацийох и госцински упознал з актуалну миґрантску кризу на подручу општини Шид.
Як донацию з Япону Дом здравя Шид нєдавно достал комби-превозку вредну 13 000 еври, а ЯКП „Водовод” камион-шмецар, вредносци 80 000 еври. У новембру би ЯКП „Водовод” мало достац цистерну за транспорт води, тиж вредну 80 000 еври.
Директор Дому здравя др Крсто Куреш у кратких смужкох упознал госцински з напруженями тей здравственей установи у помоци миґрантом, а свойо активносци на тим планє представели и директорка ЯКП „Страндард” Славица Сремац и директор ЯКП „Водовод” Марко Баїч, чийо подприємства тиж од початку ангажовани на помоци миґрантом, од штредку септембра прешлого року.
Спрам урядових податкох, вчера на подручу општини Шид у шицких трох прилапююцих центрох були реґистровани вкупно 1 860 миґранти.
Госцински нашивели и Дом здравя, як и прилапююци центри за миґрантох при Адашевцох, у Шидзе при гайзибанскей станци и „Принциповец” и подзековали домашнїма на госцопримстве и помоци хтори локална самоуправа дава миґрантом, та обецали нови донациї.
