Вшелïяк же 2022. року найгласнєйша наукова вистка и найвекша увага була придата телескопу под назву – „Джеймс Веб вселенски телескоп” (познати як „JWST” зоз  англ. „James Webb Space Telescope”). Яки то тот телескоп? Прецо є таки важни? Цо нам вон значи?  И прецо бизме вообще требали обрациц увагу на ньго?

Почнïме од початку. Єдного дня, у септембру, 1989. року порушана приповедка о новим моцним телескопу (гей, думам на JWST, но теди ище вше нє мал мено). Мале надпомнуце, у тим периодзе телескоп „Габл” бул порихтани, алє ище нє бул лансирани до орбити, а науковци уж почали роздумовац о новим и моцнєйшим телескопе. JWST бул меновани 13 роки познєйше, (гоч нєшка його мено досц контроверзне, так же можебуц док читаце тот текст мено и вименєте), а його вибудова урядово почала 2004. року.

ВИБУДОВ ТЕЛЕСКОПУ

Вибудова компонентох телескопу тирвала барз длуго, найвецей пре велькосц телескопа и огромну комплексносц примарного жвератка. А цо то примарне жвератко? – То праве главна компонента хтора збера шветлосц и потим ю унапрямує (фокусира) до секундарного жвератка, котре потим далєй унапрямює шветлосц до инструментох, а котру ми вец знïмаме и анализуєме. У сущносци, цо векше жвератко то вецей шветлосци можеме позберац, а цо вецей и длужей збераме шветлосци, то можеме видзиц далєй и далєй до вселени и обачиц барз бляди обєкти. А прецо нам то важне? Праве прето же зоз таким инструментом нам циль по першираз зняц и анализовац перши ґалаксиï котри настали у вселени, та аж и перши гвизди!

Конструкция була компликована пре вельо технïчни препреченя котри требало пребродзиц – жвератко потераз найвекше цо требало лансирац до вселени, чий пречнïк 6,5 метери. Пре велькосц одлучене же би ше воно состояло зоз 18 хексаґонох, од по 1,32 метери. Понеже пре свою велькосц телескоп нє могло лансирац до вселени так лєгко и у цалосци, його дизайн направени як ориґами. Його компоненти направени так же би ше у вселени розтворели и зложели до єдней цалосци. Наисце историйни момент за инжинєрство, понеже гей, кед лєм дацо нє пойдзе по планє – готове! Нє можеме шеднуц на даяку „Вселенску ладю” и пойсц оправиц го.

30 РОКИ, 1200 НАУКОВЦИ И 10 МИЛИЯРДИ ДОЛАРИ

После вецей як 30 рокох, прейґ 1200 науковцох хтори робели на тим проєкту и после потрошених прейґ 10 милиярди доларох, телескоп лансирани 25. децембра 2021. року. Кажди дзень бул напарти и полни зоз емоциями и стресом. Требало му 30 днï же би прелєцел милион и пейцсто тисячи километри, у лєце ше зложел до цалосци и сцигол на свойо одредзене место. Кед поровнаме же, наприклад, Мешац просеково оддалєни од Жеми коло 385 тисячи километри, значи же телескоп скоро штири раз далєй од Мешаца! Прецо? Постоя вецей причини – прето же ше ту находзи ґравитацийно вигодне место, такволана Л2 точка, дзе обєкти можу буц у стабилней орбити. У тим месце ґравитацийне дïйство Жеми и Слунка медзисобно вибалансовани, так же телескоп ту може буц „паркирани” на длужей. А тиж и прето же є защицени од зарйованя и цеплоти тих нєбесних целох.

Положенє телескопа и жимни условия нєобходни за його функционованє, же би могол знïмац вселенски обєкти у инфрачервеней шветлосци. Чек’!, а прецо инфрачервена шветлосц? Причини за таки инструменти праве пре науку котру жадаме випитовац, ниа лєм три обласци хтори барз цикави…

1) Телескоп будзе знïмац места на хторих наставаю гвизди, такволани небули (гвиздово яшелька) – то вельки хмари ґазу и праху. А праве инфрачервена часц шветлосци оможлïвює видзиц през тот прах и оможлïвює детальне випитованє родзеня нових гвиздох.

2) Тиж так циль знïмац и анализовац бааарз оддалєни вселенски обєкти, найдальши ґалаксиï и гвизди. Циль анализовац наставаня перших гвиздох у вселени и перших ґалаксийох. Зоз тим телескопом треба же бизме достали директни докази о тих збуваньох котри ше у вселени одбували после лєм 400 милиони роки од єй наставаня – Велького праску.

Ту постоя велï препреченя. Пре ширенє вселени шветлосц хтора рушела зоз перших гвиздох и перших ґалаксийох ше буквално розцагла и тераз ю вецей нє видно у такволаней оптичней часци шветлосци, алє ю мож детектовац лєм у инфрачервеней. И праве таки обєкти ше буду глєдац и анализовац у знïмкох котри буду сциговац зоз телескопу.

3) Зоз инфрачервенима инструментами, телескоп тераз знïма и атмосфери звонкасоларних планетох (планетох котри присутни коло других гвиздох). Зоз такима податками можеме одробиц детальну хемийну анализу атмосферох тих планетох.

Потераз пренайдзени прейґ 5 тисячи звонкасоларни планети, а даскельо стотки од тих планетох ше находза у такволаней Хабитабилней зони – простор коло гвизди у котрим вигодни условия же би на планети постояла вода у чечним стану. Праве таки планети у першим плану же би ше випитали зоз Веб телескопом.

ЧИ ЗМЕ САМИ У ВСЕЛЕНИ?

Циль виглєдованьох других планетох праве же би ше пренашло докази о постояню живота и индзей у вселени. Як то можлïве? Зоз такволану спектроскопию – анализу шветлосци. Зоз випитованьом других планетох, буду ше глєдац ткв. биомаркери котри указую на постоянє живота. Ту спадаю – оксиґен, угльов-диоксид, метан, водова пара итд. Таки виглєдованя нам можу оможлïвиц же бизме пренашли планети подобни за живот, а тиж и планети на котрих можебуц уж и постоï живот!

Уж вецей як пол рока Веб телескоп нєпреривно роби, знïма одредзени часци нєба и вселенски обєкти и науковци нєпреривно обробюю податки и обявюю науково роботи и пренаходки. Уж звалєни рекорди у найоддалєнших ґалаксийох, зняти нєвироятни деталï блïзких ґалаксийох и гвиздових яшелькох, та маме и детектовану водову пару у звонкасоларней планети.

Хвильково ше находзиме у периодзе у котрим дознаваме огромне количество детальох о вселени, та можлïве аж же пофришко достанєме и одвит на питанє чи зме сами у вселени! 

Илустрациї: Др Роберт Джуджар