ШИД – У рамикох проєкту „Змоцньованє капацитетох локалних совитих за миґрациї“, вчера у локалней самоуправи Шид отримани округли стол членох совитох за управянє з миґрациями Шиду и Лозници, а у рамикох ґлобалней програми „Уключованє миґрацийох до националней политики розвою“.
Искуства з миґрантами у шидскей општини винєсол предсидатель Општинского совиту за управянє з миґрациями Ивица Йович и визначел же ше вецей як рок Општина, подприємства, установи и други державни орґани на тим подручу стараю о миґрантох.
Спред Городу Лозница бешедовал заменїк городоначалнїка Радован Дивнич, а на округлим столє бешедовали и представителє Комесарияту за вибеженцох и миґрациї.
На сходзе винєшени и искуства Союзней Републики Нємецкей о интеґрованю миґрантох до дружтва, до чого ше представителє Шиду и Лозници скорей прешвечели у самей Нємецкей.
Член Совиту за управянє з миґрациями Шиду и главни координатор здравствених службох за миґрантох др Крсто Куреш гварел же вчера у трох прилапююцих центрох у шидскей општини реґистровани 1 940 миґранти и же ше и надалєй запровадзує мири охрани од обераюцих хоротох.
