Отримана роботна схадзка представительох штирох маткох

автор дюп/млш
917 Опатрене

БАЧКИ ПЕТРОВЕЦ – У просторийох Матки словацкей у Бачким Петровцу вчера отримана роботна схадзка штирох маткох – словацкей, бунєвскей, рускей и сербскей, а на инициятиву Рускей матки (РМ) после схадзки з руководительством Матици сербскей у децембру прешлого року.

На вчерайшей схадзки у Бачким Петровцу участвовали предсидатель РМ Дюра Папуґа и заменїк предсидателя Миломир Шайтош, предсидателька Матки словацкей Катарина Мелеґова, предсидатель Бунєвскей матки Иван Седлак и ґенерални секретар Матици сербскей Дьордє Дюрич. Найвецей бешедоване о превозиходзеню нєзадоволююцого статусного положеня маткох и їх нєадекватного финансованя.

На схадзки винєшене и нєзадовольство зоз Законом о националних меншинох, за хтори поведзене же финансийно фаворизує парадержавни институциї, а же ше автентичним, як цо то матки, оможлївює финансованє лєм на основи проєктох. Як поведзене, и тото проєктне финансованє завиши од националних совитох националних меншинох хтори, як гварене, политизовани, и часто нєспособни и нєкомпетентни препознац квалитет проєктох и їх значносц за националну меншину.

Прето ше од Матици сербскей обчекує же би зоз своїм авторитетом и интелектуалнима, науковима и културнима капацитетами и ресурсами помогла матком у їх намаганьох зачувац национални идентитет без уплїву дньовей политики, понеже, як вчера єдногласно заключене, таку помоц нє можу обчековац од националних совитох.

Тиж поведзене же матки нє можу прилапиц уровень же су лєм здруженя гражданох, понеже таки статус нє оможлївює їх функционованє у обласцох хтори вони облапяю.

Бешедоване и о отвераню поглавйох 23. и 24. за прегварки у приступаню ґу Европскей униї и винєшене заєднїцке становиско же би и матки мали буц уключени до того процесу, як и обаванє же национални совити, пре политизацию, нє годни дац обєктивне и подполне доприношенє тому процесу.

На концу принєшена одлука же шлїдуюца заєднїцка схадзка штирох маткох будзе отримана у Новим Садзе 10. марца, у просторийох Матици сербскей, а на ню буду поволани представителє городскей, покраїнскей и републичней власци и институцийох, як и медиї.

2-Matki-02

ПОВЯЗАНИ ТЕКСТИ