Сербиї отворени поглавя 23 и 24 у процесу приступаня ґу ЕУ

автор саб/зам/н1/ртв; фото танюґ
1k Опатрене

БРИСЕЛ (ЕУ) – Прегваряцки поглавя 23 и 24, оценєти як ключни у процесу приступаня Сербиї ґу Европскей униї – отворени вчера на Медзивладовей конференциї у Бриселу, пренєсли медиї. Поглавя 23 и 24 ше одноша на общи права, односно обласци правосудства, безпечносци и людских правох, дзе и меншински права, а буду заварти на концу прегваряцкого процесу.

На Медзивладовей конференциї у Бриселу присуствовали министер вонкашнїх дїлох Словацкей Мирослав Лайчак, як представитель терашнєй предшедуюцей держави у ЕУ, комесар за преширенє ЕУ Йоганес Ган и представителє технїчней Влади Сербиї – премиєр Александар Вучич, министер вонкашнїх дїлох Ивица Дачич и министерка за евроинтеґрациї Ядранка Йоксимович.

Лайчак оценєл же отверанє поглавйох добра вистка и за Сербию и за Унию, а Ган обецал помоц Европи у процесу запровадзованя догвареного, цо нє будзе лєгко, понеже евроинтеґрациї нє лєм формални, алє насампредз сущни процес хтори ше одноши на шицки сеґменти дружтва держави кандидата.

Александар Вучич оценєл же отверанє поглавйох 23 и 24 потвердзело стратеґийне опредзелєнє Сербиї же би постала член ЕУ, бо правна и ушорена держава препорученє инвеститором за укладаня у Сербиї, цо предусловиє за висши животни стандард гражданох. Тиж так, премиєр Вучич гражданом Сербиї вчера повинчовал отверанє спомнутих поглавйох.

Аналитичаре оценюю же поглявя 23 и 24 барз важни за дальше напредованє у предприступним процесу, односно отверанє и заверанє других поглавйох, як и Поглавє 35, хторе ше одноши на нормалозованє одношеньох Београду и Приштини.

Сербия дотераз отворела штири з вєдно 35 поглавйох. Пред поглавями 23 и 24, отворени Поглавє 32 о механїзмох финансийней контроли и спомнуте Поглавє 35.

1-EU-02

ПОВЯЗАНИ ТЕКСТИ