СЕРБИЯ – Дзень державносци Сербиї, 15. фебруар, вчера означени з велїма пригоднима манифестациями, на хторих участвовали и найвисши державнїки. Предсидатель Сербиї Томислав Николич вчера положел венєц на Памятнїк нєпознатому воякови на Авали, предсидателька Народней скупштини Мая Ґойкович венєц положела на сакофаґ вождови Карадьордьови у Церкви св. Дьордя на Опленцу, а у мено Влади Сербиї, премиєр Александар Вучич венєц положел на памятнїк Димитрийови Давидовичови, творительови Сретеньского уставу.
Дзень державносци Сербиї представя здогадованє на дзень кед на зборе у Орашцу 1804. року, на Стритениє, одлучене о дзвиганю Першого сербского повстаня, як и на дзень кед у Краґуєвцу 1835. року видати и потвердзени перши Устав Сербиї, волани и „Сретеньски устав”.
Дзень державносци Сербиї ше слави два днї, а понеже 15. фебруар того року внєдзелю, нєшка и на ютре у Сербиї нєроботни днї.
Як и на шицки державни швета, нєшка и на ютре нє робя державни орґани, институциї и установи, привредни дружтва и други орґанизациї за дїялносци и услуги.