КОЦУР – На Републичней смотри дзецинскей народней творчосци з тему „Свадзба дакеди“, хтора у Каравукове отримана 28. априла, участвовали и школяре з ОШ „Братство єдинство“ з Коцура – Сара Гарди и Алекса Дорокхази зоз штвартей класи, зоз свою учительку Лидию Будински.
Школяре з Коцура приказали традицийну руску свадзбу, а Сара Гарди освоєла и треце место за колекцию старих фотоґрафийох и предметох.
Штанд школярох з Коцура бул опремени з рижнима предметами хтори ше дакеди хасновало на руских свадзбох, а вельку помоц у його пририхтованю Школа мала од Етно- клубу „Одняте од забуца“ з Коцура.
На Републичней смотри участвовали штерацец школи хтори представели традицийни єдла, облєчиво краю одкаль приходза, предмети, обичаї, шпиванки и друге.