У керестурским хотаре початком септембра закончена тлачидба слунечнїку, а тлаченє сої закончене штредком мешаца. У хотаре уж почала и ламачка кукурици, перше лєм у чуткох, док лупанє кукурици почало пред тижньом.
Найвекши пошлїдки сушного року у Руским Керестуре могло обачиц на Вельким селищу, дзе жем першей и другей класи, а под час веґетативней сезони спадло коло 5 литри дижджу по метеру квадратним.
Слунечнїк плацел солидно, вецей як прешлого року. Тогорочни штреднї урожай бул од 20 до 30 метери по гольту, а влонї бул од 20 до 25, кед подруцел пре витри и бурї котри го поваляли кед уж мал досц чежки калапи.
ЗОЗ СЛУНЕЧНЇКОМ ЛЄПШЕ ЯК ВЛОНЇ
Потераз ище нє позната конєчна цена слунечнїку, а аконтна у Керестуре 36 динари за килограм. Прешлого року конєчна цена слунечнїку при одкупу була лєм 33 динари. Поровнуюци тоти два роки, гоч тот бул и сушни, за слунечнїк бул вигоднєйши.
У одношеню на прешли рок, урожай сої у керестурским хотаре преполовени, бо того року по гольту натлачени од скромних 8, до 20 метери по гольту у часцох хотара дзе було дижджу. Прешлорочни урожай сої бул од 25 до 30 метери по гольту, а предавало ше ю по 40 динари за килоґрам. Тераз аконтна цена сої од 45 до 50 динари, зависно од одкупного места, а обчекованя таки же сиґурно будзе векша од 50 динари.
Лаґерованє сої ше указало як добра инвестиция прешлого року, бо цена по децембер поросла за коло дзешец одсто, а тенденцию росту затримала по април того року. Перши три мешаци лаґер безплатни за параста под условийом же ше ю преда до силосох котри ю лаґеровали.
СЕЗОНА НЄВИГОДНА ЗА СОЮ
Керестурец Славко Малацко прекоментаровал же то була подла сезона за сою, алє з урожайом коло двацец метери по гольту, вон заш лєм презадовольни.
– Тота сезона була досц нєвигодна за сою, пре длугоки периоди без дижджу и екстремно високи температури квитки сої ше нє оплодзовали як би требало, потим и зарна у маунох нє мали нагоду напредовац. Спатраюци цалосну ситуацию, презадовольни сом сом урожайом од 19 до 21 метер по гольту – гварел Славко Малацко.
Же соя подруцела зоз урожайом видно и по зменшаню количества соянки котру же пресує за топенє. Прешлого року з гольта могло напресовац коло сто бали, а того року од 50 до 70 бали.
КУКУРИЦА БАРЗ РОЗЛИЧНА
Як ше потераз указує, урожаї кукурици у керестурским хотаре того року буду барз розлични, зависно од квалитету жеми, часци хотара и количества паданьох. Ламачка кукурици у чуткох почала нєславно ище концом авґуста.
Вельки пошлїдки охабели и ярнї мрази, котри досц очкодовали теди праве зидзену кукуричку. Комбайнер Янко Чапко мал нагоду видзиц тоти пошлїдки од початку ламачки и лупаня.
– На початку ше ламало и лупало кукурицу котра чежше поднєсла сушу, та и тоти урожаї були досц мали. Мушим повесц же урожаї цалком нє виєдначени и єст од 20 до 70 метери лупаней кукурици по гольту. У хотаре могло видзиц подєднак барз красни и барз подли кукурици – виприповедал Янко Чапко.
Тих дньох подлєйши кукурици мали влагу од 12 до 15 одсто, а лєпши кукурици котри ше углавним ламу у чуткох маю влагу од 19 до 23 одсто. Лупану кукурицу ше предава на штирох одкупних местох у валалє, а цена од 16,5 до 16,7 динари, кед ма влагу до 14 одсто.
УПЛЇВОВАЛИ ВЕЦЕЙ ФАКТОРИ
Ситуация розлична, а на урожай уплївовали вецей фактори – час садзеня, применьованє аґротехнїчних мирох, квалитет жеми и часц хотара, пре количество паданьох. Треба ше здогаднуц же були ярнї мрази, а вец суша.