Вишла кнїжка професора Рамача о Руснакови котри бул „єден вояк”, прежил „два рабства” и ношел „три униформи”

автор Б. Варґа
377 Опатрене

НОВИ САД – Тих дньох у виданю Оддзелєня за русинистику Филозофского факултета Универзитета у Новим Садзе и НВУ „Руске слово” вишла кнїжка, студия проф. др Янка Рамача „Єден вояк, два рабства, три униформи”.

Кнїжку професор Рамач закончел 2022, алє є финализована прешлого року у видавательней едициї НВУ „Руске слово” – „Фундаменти”.

Студия преписки супруга з войни, котри писал дому супруги зложена з трох окремних часцох, котри цесно повязани медзи собу. Перша часц – Здогаднїк реґрута уж була опубликована як историйне жридло, з потребнима коментарами, и ту ше приноши у истей форми. Друга часц – Преписани писма и карточки Осифа Колошняя, котри посилал супруги як резервиста Югославянского войска у першей половки 1941. року, як резервиста мадярского окупацийного войска „на вежбох“ 1942. и 1943. року, и на концу як вояк мадярского войска на Восточним фронту и як ранєти, док ше лїчел у вецей шпитальох на териториї Ческей, Австриї и Мадярскей. Писма преписани як историйне жридло, так як их вон писал: нє виправяни анї правописни гришки кед писал по руски, або ридше по мадярски, же би ше видзело як писал звичайни чловек, котри закончел по руски лєм даскельо класи. Ту ше даваю и потребни коментари. Треца часц, тиж уж публикована − статя з назву Писма вояка, у котрей представени и анализовани писма и карточки, котри Осиф писал супруги Веруни у периодзе од 1941. по 1945. рок.

Друкованє тей кнїжки финансийно помогла Вера Гайдук з фамелию, дзивка Осифа Колошняя, як и НВУ „Руске слово” и Филозофски факултет Универзитета у Новим Садзе

Кнїжку мож купиц по цени од 500 динари, прейґ колпортерох по наших местох, у представительствох НВУ „Руске слово” (у Новим Садзе на новей адреси Футожска 2, ІІІ поверх (од 9 по 14 годзин) телефон 021/6613-697; у Руским Керестуре у будинку дакедишнєй Друкарнї на 2. поверху и на телефон 025/5100383 або 025/703-311 (од 9 по 14 годзин).

Кнїжки найлєгчейше наручиц прейґ сайту https://knjizkiporuski.com/

ПОВЯЗАНИ ТЕКСТИ