РУСКИ КЕРЕСТУР – Базен у Руским Керестуре знова безпечни за купанє, бо вода на брани на Старим беґелю пущена, понеже ришени проблеми на преводнїци Дунай-Тиса-Дунай при Зомборе. Як дознава Рутенпрес, до мотору на преводнїци при Зомборе вдерел гром, та и брана була заварта пре санацию чкоди, водостай на базену бул зменшани, а купанє у нїм нє було препоручлїве.
ЯП „Води Войводини” тих дньох покошело беґель од Крущичу по Керестур, а очисцело и беґель опрез брани дзе була нагромадзена пластична амбалажа, цо вимагали гражданє Керестура.