РУСКИ КЕРЕСТУР – Внєдзелю, 3. юния, отримане традицийне змаганє у риболову котре орґанизовало Здруженє спортских рибарох „Коляк” зоз Руского Керестура. Змаганє було на Лалицкей писти на беґелю Дунай-Тиса-Дунай, а участвовали 25-еро змагателє, члени ЗСР „Коляк”.
Того року бул лєм єден змагатель вецей як прешлого року, алє обачиц зменшанє сениорских змагательох котрих було лєм 12, а пионирох аж 13. Вироятнє же ше на змаганє пионире одволали у таким чишлє прето же праве пред тим закончена и Школа за малих рибарох у форми едукативних роботньох котри орґанизовало Здруженє, а зоз цильом прицагованя цо векшого числа дзецох.
У катеґориї старших рибарох перше место завжал Яким Джуджар, друге Мирко Фекете, а треце Златимир Рамач, шицки троме искусни рибаре, алє у своєй мрежи анї єден нє мал три килоґрами.
У катеґориї пионирох перше место завжал Никола Максимович (2006) зоз Лалитю, друге Борис Жирош (2004), а треце место Никола Максимович (2004), обидвоме з Керестура.
По законченю трогодзинового змаганя за шицких учашнїкох, членох Здруженя и публику у їх лєтнїковцу на базену порихтани полудзенок, дзе побиднїком уручени наград, а шицки змагателє достали и символични дарунки и дипломи.