НОВИ САД – Подпредсидатель Сербскей напредней странки Милош Вучевич вчера виявел же задзекованє предсидателя Општини Кула Перици Видеканїча нє нєобчековане и же будзе ище пременки на шицких уровньох власци.
Вучевич здогаднул же зоз СНС скорей наявене же будзе превипитана робота шицких локалних, покраїнских и републичних функционерох.
Звичайне оценьовац їх роботу и то согласне зоз одлуками Вивершного одбору странки, а о роботи предсидателя општини конєчне слово даю гражданє Кули. Можем лєм повесц же то нє будзе єдина пременка у Войводини, гварел Вучевич, замодлєни коментаровац задзекованє Видеканїча.
Видеканїчово задзекованє вимагала Аґенция за борбу процив корупциї и то була тема схадзки локалного парламенту ище 30. януара, а понеже ше одборнїки вияшнєли процив вимоги аґенциї, вон предлужел окончовац тоту длужносц.
Понеже пред даскелїма днями Видеканїч поднєсол задзекованє, Скупштина Кула у обовязки за 15 днї вибрац нового предсидателя.