БЕОҐРАД – Держава и у тим року повяже стаж роботнїком котрим хибя роки за пензию, прето же им роботодавателє нє уплацовали доприноси за пензийне и инвалидске ориґуранє, а фирми тераз у процесу приватизациї, реструктуованю, лєбо у предликвидациї, пише „Политика”.
Термин за повязованє стажу предлужени по конєц рока за шицких бувших занятих котри 13. авґуста 2014. року мали знак „у реструктуированю”, а котри здобули условиє за пензию, потим за бувших занятих у фирмох у хторих 2015, 2016 и 2017. року почала предликвидация, та за тих котри 2017. року здобуваю условия за пензию и по тей основи им престава роботне одношенє.
Пенєж за уплату доприносох за пензийне и инвалидске осиґуранє за занятих у подприємствох у хторих ше будзе повязовац стаж обезпечени з буджету Сербиї.
Стаж ше повязує з найнїзшу мешачну основу, та то була главна причина же ше у першим терминє приявело мале число бувших занятих за реґулованє стажу, понеже им з тим и менши просек пензиї.
Медзитим, велїм то єдини способ за пензионованє, бо им без спорних рокох стажу будзе зменшана пензийна основка.
Од початку 2016. року, з 13 000 роботнїкох котри мали условиє за пензию, лєм 920 пристали же би им держава повязала нєплацени роки стажу.