Прешлого мешаца, як цо уж вецейрочна традиция, у Кули и Новим Садзе ше отримали два значни театрални манифестациї: од 16. по 24. юний, Кулянци привитали госцох у рамикох 59. републичного фестивалу аматерских театрох Сербиї. У змагательней програми публика мала нагоду опатриц осем представи аматерских театрох зоз Мачванского Прнявора, Рачи, Лебанох, Беоґраду, Велькей Плани, Червинки, Крущичу, Кули як и новосадску представу звонка конкуренциї одбавену закончуюцого вечара на чесц наградзених. Жири фестивала у составе Мирослав Бенка, ґлумец и режисер зоз Старей Пазови, новосадски театролоґ Мирослав Радонїч и Миломир Неделькович, ґлумец з Кралєва, додзелєли златну плакету за освоєне перше место, червинскей представи, театра 
“Стеван Сремац” “Малогражданска свадзба” по тексту Бертолда Брехта. Медзи велїма наградами за ґлумецки и други витвореня, тому фалату припадла и векшина других наградох, медзи иншим и за режию – познатого нам ґлумца зоз Сербского народного театру Радоя Чупича. Мали куриозитет же у жирию публики була пензионована длугорочна професорка сербского язика велїм Керестурцом – Слободанка Настасич.
Такой за тим, од 25. юния по перши юлий у Новим Садзе отримани 44. ИНФАНТ – Медзинародни фестивал алтернативного и нового театру, цо зме и наявели у прешлим чишлє ЛС. Спред трочленого жирия новосадски професор, писатель, театролоґ Зоран Дєрич “награду за окремну експресивносц на гранїчним подручю медзи театром и другима уметносцами, лєбо творчосцу у найширшим смислу” додзелєл америцкей представи “Правила бависка” Джона Бокаера. Покля за найудатнєйши експеримент, односно представу у цалосци, жири одлучел наградзиц “Шекспир, сонет 66” Мадярского державного театру з Темишвару у режиї Кокана Младеновича.
аНайцикавше же у вязи з тим ше оглашел беоґрадски режисер и колумниста Златко Пакович, замерковююци политичну кориґуюцосц такей одлуки, як пошлїдок ощербеносци Младеновичовей представи “Мост на Дрини” на остатнїм Стерийовим позорю, о чим зме тиж писали у рамикох звиту з Позоря. Пакович нє препушел анї, з тей нагоди, подоганяц селекциї, жирию, у тим случаю указуюци на хибносц компетенциї, а менєй политичи уплїв “з верху”, прецо ше збурели духи на и коло Позоря.