НОВИ САД – У Новим Садзе починаю Змайово дзецински бависка Медзинародного литературного центру за дзеци. Юнийски фестивал того мултимедиялного проєкту котри афирмує творчосц за дзеци и младих, як и дзецинску творчосц, од 7. по 11. юний пририхтал богату програму.
Вецей як сто програмни активносци орґанизовани на рижних локацийох у городзе, як и у сушедних местох (отворених городских просторох у центре Нового Саду, школох, дзецинских заградкох, ґалерийох, музейох, библиотекох…). У програмох, хтори конциповани на постулатох мултимедиялносци и интерактивносци на релациї дзецко-уметнїк и дїло-уметнїк, и хтори стимулую културни розвой при наймладшей популациї, директно участвую вецей як 8 000 дзеци и млади, як и прейґ 100 професийни уметнїки.
Юнийска програма Змайових дзецинских бавискох представя найстарши фестивал такей файти у Европи, а по обсягу є найрижнороднєйша и наймасовнєйша.
Кажди рок манифестацию нащивя вецей як 60 000 людзе (дзеци, млади, фамелиї, орґанизовани нащиви предшколских ґрупох и школских оддзелєньох з нашей жеми и з державох у реґиону). Потримовку програмом даваю и дружтвено одвичательни компаниї и компетентни державни институциї, а уход и участвованє у шицких програмох безплатни.